മനോരമ ഓണ്‍ലൈനില്‍ പ്രസിദ്ധീകരിച്ച ലേഖനത്തില്‍ നിന്ന്

പ്രസവത്തിനു ശേഷമുള്ള ലൈംഗിക ജീവിതത്തെക്കുറിച്ച് പലർക്കും പല സംശയങ്ങളാണ്. പ്രസവത്തിനു ശേഷം എപ്പോൾ ലൈംഗിക ബന്ധം പുനരാരംഭിക്കാം, സ്ത്രീകളുടെ ലൈംഗിക താൽപര്യം പ്രസവശേഷം കുറയുമോ എന്നിവയെല്ലാം സാധാരണ തോന്നുന്ന സംശയങ്ങളാണ്. സുഖപ്രസവമോ സിസേറിയനോ എന്തുതന്നെയായാലും ലൈംഗിക ജീവിതം പുനരാരംഭിക്കുന്നതിനു മുൻപ്, ചികിൽസിച്ച ഗൈനക്കോളജിസ്റ്റിന്റെ അഭിപ്രായം നിർബന്ധമായും തേടണം. സിസേറിയൻ സമയത്തെ സ്റ്റിച്ചുകളും സുഖപ്രസവ സമയത്തെ ആന്തരിക മുറിവുകളും ഭേദമാകാതെയുള്ള ലൈംഗികബന്ധം സ്ത്രീയുടെ ആരോഗ്യത്തെ സാരമായി ബാധിക്കാം.

പ്രസവത്തിനു ശേഷം രണ്ടു മൂന്നു മാസം കഴിഞ്ഞ് ലൈംഗികബന്ധത്തിൽ ഏർപ്പെടുന്നതാണ് സ്ത്രീയുടെ ആരോഗ്യത്തിന് അഭികാമ്യം. അതു കൊണ്ടാവാം പ്രസവശേഷം മൂന്നു മാസം സ്ത്രീയുടെ വീട്ടിൽ ചെലവഴിക്കുകയെന്ന പൊതുരീതി കാലങ്ങളായി പിന്തുടുരന്നത്. ലൈംഗിക ബന്ധത്തിന് ആരോഗ്യകരമായ സമയം വരെ കാത്തിരിക്കണം എന്നു കരുതി പങ്കാളികൾ തമ്മിലുള്ള ആത്മബന്ധത്തിനു തടസം വരാതെ നോക്കേണ്ടതായുണ്ട്. കുഞ്ഞിനെ അമിതമായി പരിപാലിക്കുന്നു എന്ന ചിന്ത ചില ഭർത്താക്കന്മാരിൽ ഉടലെടുക്കാനും സാധ്യതയുണ്ട്. പരസ്പരം ലാളനകളും സ്നേഹ പ്രകടനങ്ങളും കുഞ്ഞു പിറന്നതിനു ശേഷവും ദാമ്പത്യം കൂടുതൽ ഊഷ്മളമാക്കാൻ സഹായിക്കും.